Dioplóma Iarchéime sa Ghaeilge do Mhúinteoirí
Fáilte
Aidhmeanna
Cúis áthais do Choláiste na Tríonóide, Baile Átha Cliath, in éineacht le hInstitiúid Oideachais Marino, clár nuálach dhá bhliain a thairiscint atá dírithe ar scileanna múinteoirí cláraithe iar-bhunscoile sa Ghaeilge a fheabhsú. Beidh rannpháirtithe an chláir in ann clárú chun an Ghaeilge a mhúineadh go dtí leibhéal na hArdteistiméireachta i scoileanna tar éis dóibh an clár a chur i gcrích go rathúil.
Cuirtear an clár páirtaimseartha seo, a thosaigh mí Eanáir 2025, ar fáil ar bhealach solúbtha agus nuálaíoch chun rannpháirtíocht leathan a chumasú, chun freastal ar mhúinteoirí i róil lánaimseartha agus pháirtaimseartha araon, chomh maith leo siúd atá lonnaithe ar fud na tíre.
Déantar an clár a sholáthar ar bhealach a chuirfidh ar chumas rannpháirtithe tabhairt faoi eispéiris foghlama nua thar fhoghlaim duine le duine, ar líne agus bunaithe ar chleachtas.
Seisiún Eolais
Faid
Maireann an cúrsa ar feadh dhá bhliain acadúil, an chéad dream eile ag tosú Mí Eanáir 2026, agus is cúrsa staidéir páirtaimseartha é.
Struchtúr freastail: Roinnt eolais sa bhfíseán thuas agus sa seó sleamhnáin ón oíche eolais (PDF de na sleamhnáin Powerpoint). Beidh ranganna ar siúl ar líne dhá thráthnóna sa seachtain, agus beidh dhá lá (Sathairn) ag mic léinn ar an gcampas gach téarma.
Iarratais
Dáta deiridh iontrála le haghaidh Eanáir 2026: 1.12.2025
Tá an tairseach dúnta anois don bhliain 2025. Osclófar sna seachtainí romhainn (Earrach 2025) an tairseach le haighaidh iarratais don bhliain 2026. Seoladh an cúrsa i Mí Mheán Fómhair 2024 agus bhí oíche eolais againn ar an 2 Deireadh Fómhair ar líne - féach an físeán thuas. Tá an t-eolas seo fós bailí agus úsáideach don té a bheadh fiosrach faoin gcúrsa i 2026.
Le cur isteach ar an gcúrsa, beidh fianaise ag teastáil go bhfuil iarrthóirí ag Leibhéal B1 den Teastas Eorpach sa Ghaeilge (TEG). Tá leibhéil éagsúla TEG bunaithe go ginearálta ar An Fráma Tagartha Comónta Eorpach do na Teangacha: Foghlaim, Teagasc agus Measúnú (Comhairle na hEorpa, 2001). Is féidir fianaise a fháil ó do Ollscoil má tá cáilíocht éigin agat cheana sa Ghaeilge, nó cuirfidh TEG scrúdú ar fáil mí na Bealtaine sa chaoi is go mbeadh na torthaí sin ar fáil in am le tabhairt faoin gcúrsa.
Má tá litir agat ó institiúid 3ú leibhéal ag dearbhú leibhéal B1, glacfar leis sin. Tá fúinn scrúdú iontrála (ar aon dul le scrúduithe TEG) a reáchtáil Fómhar 2025 do iarrthóirí nach mbeadh teastas TEG / litir ollscoile acu.
Mar sin, beidh na rudaí seo a leanas ag teastáil:
- fianaise go bhfuil leibhéal B1 bainte amach agat sa Ghaeilge de réir an Fráma Tagartha Comónta Eorpach do na Teangacha (ní hionann é seo agus toradh Ardteistiméireachta) - teastas TEG, litir Ollscoile nó toradh rathúil ar an scrúdú iontrála;
- cóip de do thras-scríbhinn acadúil (íosleibhéal de 2.2 sa Bhunchéim san Oideachas, sa Dioplóma Iarchéime san Oideachas nó sa Mháistreacht san Oideachas)
- CV reatha
- iarratas comhlánaithe go hiomlán (ar líne, nasc le teacht)
- fianaise go bhfuil tú cláraithe mar mhúinteoir iarbhunscoile (Bealach a Dó) le Comhairle na Múinteoirí
- dhá theistiméireacht, agus is gá gur teistiméireacht acadúil ceann díbh sin
- má tá tú fostaithe mar mhúinteoir faoi láthair, beidh litir ag teastáil ón bpríomhoide ina dtagraítear do riachtanais na scoile maidir le teagasc na Gaeilge
Riachtanais incháilitheachta agus roghnaithe: tabharfar tús áite d’iarrthóirí bunaithe ar a dtaithí mar mhúinteoirí; ar a scileanna teanga; ar riachtanais na scoile (dearbhaithe ag an bpríomhoide).
Más mian leat ceist ar bith a chur orainn, seol rphost chuig riarthóir an chúrsa, Caoimhe ní Bhraonáin, ag Dioploma.Gaeilge.Muinteoiri@tcd.ie.
Obair an chúrsa
Struchtúr an chúrsa: Cúrsa solúbtha páirt-aimseartha é an Dioplóma agus dearadh an sceideal do mhúinteoirí atá ag obair go lánaimseartha. Beidh idir léachtaí ar líne (65%) agus ar an láthair (35%) i gceist, sna tráthnónta, ar an Satharn agus le linn laethanta saoire scoile. Beidh tréimhse cónaitheach Gaeltachta i gceist mar chuid den chúrsa.
Bliain 1
- Dánta, stáitse agus scáileáin
- Cumarsáid agus litearthacht 1
- Curaclam agus comhthéacs
- Pobal agus teanga na Gaeilge
Bliain 2
- Oideolaíocht na Gaeilge
- Cumarsáid agus litearthacht 2
- Téacsanna Gaeilge trí na haoiseanna
- An Ghaeilge don Seomra ranga
- Fathaigh an phróis
Beidh 4 sheachtain san iomlán agaibh sa Ghaeltacht i rith thréimhse an chúrsa (dhá thréimhse coicíse).
Cuirfear leagan amach na modúl agus lámhleabhar an chúrsa ar fáil anseo in am tráth. Más mian leat bheith ar liosta eolais don chúrsa, seol rphost chuig riarthóir an chúrsa, Caoimhe ní Bhraonáin, ag Dioploma.Gaeilge.Muinteoiri@tcd.ie.