Ranganna Gaeilge i gColáiste na Tríonóide

Téarma na Féile Michíl 2024

Beidh ranganna Gaeilge á reáchtáil ag Oifig na Gaeilge i gcomhar le Gaelchultúr do Théarma na Féile Michíl 2024.

Dátaí

Cuirfear tús leis na ranganna an tseachtain dar tús Dé Luain 19 Meán Fómhair 2024 agus leanfaidh siad ar aghaidh ar feadh sé seachtaine, ag críochnú an tseachtain dar tús 11 Samhain 2024. Ní bheidh aon rang ar siúl le linn na seachtaine staidéir ón 21-25 Deireadh Fómhair.

Beidh na ranganna ar siúl gach seachtain agus mairfidh gach ceann thart ar 50 nóiméad.

Foghaimeoirí

Beidh na ranganna á gcur ar fáil do mhic léinn agus do bhaill foirne Choláiste na Tríonóide agus beidh siad saor in aisce.

Leibhéil

Cuirfear ceithre leibhéal éagsúil ar fáil, ó leibhéal tosaitheora go meánleibhéal.

Moltar duit triail ghearr a dhéanamh ar líne chun an leibhéal is oiriúnaí duit a ríomh. Is féidir tabhairt faoin triail ag an nasc seo agus tá cur síos ar na leibhéil agus ar na scóir le fáil anseo.

Beidh ábhar na gcúrsaí ag teacht le Teastas Eorpach na Gaeilge (TEG), scrúduithe agus cáilíochtaí atá aitheanta go hidirnáisiúnta. Cuireann Oifig na Gaeilge tacaíocht ar fáil do bhaill foirne agus do mhic léinn ar mhaith leo scrúdú TEG a dhéanamh. Déan teagmháil le gaeloifig@tcd.ie le haghaidh tuilleadh eolais.

Cur Chuige Teagaisc

Ranganna teanga a bhíonn i gceist agus ní bhronntar teastas ag deireadh na gcúrsaí.

Baineann Gaelchultúr úsáid as cur chuige cumarsáideach sna ranganna ina gcuirtear béim ar an teanga labhartha agus ar chomhrá. Múintear an ghramadach i gcomhthéacs, de réir mar a bhíonn sí ag teastáil. Tá teorainn leis an méid léitheoireachta agus scríbhneoireachta a dhéantar.

Amchlár do Théarma na Féile Michíl

Tá amchlár an téarma seo le fáil anseo. Tá na dátaí, amanna agus seomraí ranga do gach leibhéal luaite sa cháipéis.

Clárúchán

Ní mór féachaint ar an amchlár thuas agus ansin roghnaigh cúrsa amháin bunaithe ar do leibhéal, agus ar an lá agus am is fearr a oireann duit. Beidh rang amháin in aghaidh na seachtaine (c. 50 nóiméad) ag gach foghlaimeoir ar feadh sé seachtaine.

Beifear in ann clárú do na ranganna ó 9.00am Dé hAoine 20 Meán Fómhair 2024 ag an nasc atá curtha ar fáil i ríomhphost ó Oifig na Gaeilge chuig mic léinn agus baill foirne na hollscoile. Ná cláraigh do níos mó ná rang amháin le do thoil. Mura n-éiríonn leat áit a fháil i rang, is féidir clárú don liosta feithimh.

Tar éis clárú duit, ba cheart go bhfaighfeá ríomhphost uathoibríoch ó Ghaelchultúr chun do chlárúchán a dheimhniú. Seiceáil an dramhphost, le do thoil, mar d’fhéadfadh sé tarlú go mbeadh an ríomhphost clárúcháin anseo. Níor cheart clárú d'aon liosta feithimh roimh 9.00am Dé hAoine 20 Meán Fómhair 2024. Ní bhainfear úsáid as clárúcháin a dhéantar roimhe sin.

Tabhair faoi deara, le do thoil, agus an fhoirm iarratais ar líne líonta agat, go mbeidh tú cláraithe mar fhoghlaimeoir le Gaelchultúr agus go gcruthófar cuntas ar líne duit ina mbeidh tú in ann an cúrsa a bhfuil tú cláraithe dó a fheiceáil. Ní bhainfear úsáid as na sonraí a sholáthraítear ach amháin chun an próiseas clárúcháin do ranganna Choláiste na Tríonóide a éascú.

NB! Má chláraigh do rang Gaeilge le Coláiste na Tríonóide/Gaelchultúr roimhe seo, ní mór logáil isteach i do chuntas le do sheoladh ríomhphoist agus pasfhocal ar dtús, agus ansin an fhoirm chlárúcháin a líonadh. Moltar duit iarracht a dhéanamh logáil isteach trí shuíomh gréasán Ghaelchultúir roimh Dé hAoine le cinntiú roimh ré go mbeidh tú in ann teacht ar do chuntas.

Deiseanna Labhartha

Tá go leor deiseanna ann do chuid Gaeilge a chleachtadh lasmuigh den seomra ranga i gColáiste na Tríonóide:

• Bíonn ciorcal comhrá i mBialann na Butraí (Buttery Restaurant) ar an gcampas gach Céadaoin ó 10.30am-12.00pm. Cuirtear fáilte roimh mhic léinn, baill foirne agus pobal i gcoitinne. Déan teagmháil le gaeloifig@tcd.ie má tá suim agat teacht chuig an gciorcal comhrá nó buail isteach sa Bhutrach.
• Bíonn lón foirne ar siúl ó 1-2pm i seomra 3104, i bhFoirgneamh na nEalaíon gach Céadaoin i rith an téarma acadúil.
• Bíonn Éigse na Tríonóide, féile Ghaelach Choláiste na Tríonóide, ar siúl i mí Feabhra gach bliain.
• Bíonn seirbhís i nGaeilge ar fáil ón Leabharlann ó 9.00am-3.30pm ó Luan go hAoine.
• Is féidir tuilleadh eolais ar imeachtaí i rith na bliana a fháil ar chainéil Oifig na Gaeilge ar na meáin shóisialta: Instagram / X / Facebook @GaeloifigTCD.
• Bíonn imeachtaí seachtainiúla ar siúl ag an gCumann Gaelach i gcaitheamh na bliana acadúla. Is féidir tuilleadh eolais a fháil faoina gcuid gníomhaíochtaí ar líne: Instagram / TikTok / X / Facebook @CumannGaelachTCD.
• Tá Oifigeach Gaeilge lánaimseartha in Aontas na Mac Léinn agus is féidir tuilleadh eolais a fháil faoina chuid oibre agus na himeachtaí a bhíonn á reáchtáil ag AML ag: Instagram @gaeilge.amlct / X @Gaeilge_AMLCT
• Bíonn imeachtaí rialta ag mic léinn na Scéime Cónaithe i rith na bliana acadúla. Is féidir tuilleadh eolais faoina gcuid imeachtaí a fháil ar Instagram / TikTok @sceimtcd / Facebook @AnSceimTCD.